KIWEI PAT KI JINGDUWAI
Ka Pansngiat Jingpynbiang Lane Ka Jingtyrwa ha ka Snam Bakordor na ka bynta ki Lyngdoh Sohblei
(La shim na ka kot 'In Sinu Jesu' - Ha ka shadem u Jisu)
Kane ka pansngiat jong ka jingpynbiang bad ka jingïasaid la pynwan dur ban duwai da u rosary san jingmaïa kumba ju duwai rosary ha ka Maria.
Ko Blei + to wan ban ïarap ïa nga;
Ko Trai, to pynkloi ban ïarap ïa nga.
Ka burom ha u Kpa bad ha u Khun bad ha u Mynsiem Bakhuid; Kumba ka la long ha kaba myn-nyngkong, kumjuh mynta bad borabor, junom la junom. Amen.
Alleluia. (Por Lent & Advent: Ka Jingïaroh ïa Me, ko Trai, u Syiem ka burom bymjukut.)
Ha ki symboh Ko Kpa Jong ngi:
Ko Kpa bymjukut, nga tyrwa ha Me ïa ka Snam Bakorkor jong u Khun Baieid eh jong Me,U Trai jong ngi u Jisu Khrist, U Langbrot ba khlem thohbria, ban pynbiang na ka bynta ki pop jong nga bad jong ki pop jong baroh ki Lyngdoh Sohblei jong Me.
Ha ki symboh Khublei ko Maria:
Da ka Snam Bakordor jong Me, ko Jisu, To pynkhuid bad pynkyntang ïa ki Lyngdoh Sohblei jong Me.
Ha ka jaka jong ka Ka Burom ha u Kpa:
Ko Pa, na Uba baroh ka jinglongkpa ha bneng bad ha khyndew la jer,To isynei ïa baroh ki Lyngdoh Sohblei jong Me, bad to said ïa ki ha ka Snam jong u Khun Langbrot.
---------------------------------------------------------------------------------------------------
Ka jingduwai ban pynkyntang ïa ki longïing longsem
Ko Blei, u Kpa, u Khun bad u Mynsiem Bakhuid, Uba la pynlong pynman bad kyrkhu kyrdoh ïa ka longïing longsem, ngi ngeit skhem ba Me don ryngkat lang bad ngi mynta. Ngi pyndonburom ïa Me. Ngi ieid ïa Me. Ngi sngewnguh ïa Me na ka bynta ki jingkyrkhu kyrhai ba Me la ai ha ngi met bad mynsiem. Ngi sngewsih na ka bynta la ki pop. Ngi kyrpad ïa Me ba Men map ïa ki lait ki let jong ngi. To synshar, ko Trai, ïa ki ïing ki sem jong ngi. Synshar ïa ki jingmut jingpyrkhat, ki ktien ki thylliej bad ki kam ki jam jong ngi. Pynkhlaiñ ïa ka jingngeit bad ri khuid ïa ngi. Kyrkhu ïa ngi khnang ba ngin lah ban ïaburom bad ïaieid markylliang. Ïalam ïa ngi ha ka jingsuk bad ka jingïalong kawei, khlem kino kino ki jingbym-ïasngewthuh jingmut bad ki jingïakajia.
Ko Trai, to pasiaw ïa ka jingkhot jong Me na ka longïing longsem jong ngi ban mih ki lyngdoh bad ki riewniam ban shakri ïa Me bad ïa ka Balang. Ïarap bad ïada ïa kiba pang bashitom bad kiba sakma. Pyllait bad ïada ïa ngi na ka pop bad ki jingma baroh. Kyrkhu ïa kito baroh kiba la khlad noh na ki ïing ki sem jong ngi khnang ba kin ïohmad kloi ïa ka jingaiei bneng. To theh kyrhai ïa ki jingkyrkhu jong Me halor ki paramarjan marpa bad ki bahaïing hasem jong ngi. Ha kaba kut noh ka jingim, kyrkhu ïa ngi ko Trai, khnang ba mangi baroh ngin ïohbynta lem bad Me ha ka burom bneng bymjukut. Amen.
---------------------------------------------------------------------------------------------------
Ka jingduwai na ka bynta ka jingisynei
Ko Blei baisynei, namar ka dor barem ba la siewspah da u Khun baieid eh jong Me bad u Trai jong ngi, u Jisu Khrist, to isynei ïa ngi ki batlot bad ki bapop. To map ïa ki jingbakla bad ki lait ki let kiba ma ngi, ki kmie ki kpa, ki hynmen ki para, ki bahaïing hasem, ki lok ki jor bad ki bahalor jong ngi, ngi la leh. Wat buh ïa ngi ha ka thup jingpynshitom ha ka Jingbishar jong Me, hynrei to pdiang ïa ngi kum ki jong Me da kaba sait bad pynkhuid ïa ngi ha ka Snam Bakordor, kaba la phlei na ka bynta jong ngi, da u Khun baieid eh jong Me. Ïada ïa ngi na ki jingsniew bad to pyllait ïa ngi na ki jingpynshoi baroh da ka bor jong ka Diengphna Bakhuid jong Me.
Junom la junom, ko Trai Badonbor tam, u Kpa, u Khun bad u Mynsiem Bakhuid. Amen
---------------------------------------------------------------------------------------------------
Ka jingduwai na ka bynta ka jingmap
Ko Trai Jisu baieid, Me uba la shahshitom da kaba map bad ïap da kaba shahshitom, nga map ha ka Kyrteng Bakhuid jong Me ïa kito baroh kiba la pynmong ïa nga. Ha ka Kyrteng Bakhuid jong Me, nga kyrpad ban ïoh ïa ka jingmap na kito baroh kiba nga la pynmong. Ko Trai, to ai ha ki ka jingaiei ba kin lah ban map ïa nga. Nga kyrpad ïa ka jingmap jong Me na ka bynta kito kiba ki kam basniew jong ki nga la ïohi, ïohsngew ne tip mynta. Nga ruh, nga map ïa ki. To pynkoit ïa ki jingmong jong ngi da kaba sait ïa ngi baroh ha ka Snam Bakordor jong Me, ko Trai Jisu. Pyndap ïa ngi da ka jingkmen, jingsuk bad jingied jong Me. Ai ha ngi ïa u Mynsiem Bakhuid.
Nga ïaroh ïa Me Jisu na ka bynta baroh ki jingmong, ki jingeh bad ki jingjynjar kiba nga la ïohmad na ka daw ka jingbymïoh ïa ka jingieid ha ki sngi jong ka jinglong khynnah jong nga, bad ïa kiba nga dang ïai mad wat haduh kine ki sngi.
Ko Trai Jisu, pyndap ïa nga da u Mynsiem jong Me ha baroh ki khep jong ka jingjynjar, ka jingsngewsih bad ka jingpang jingshitom jong nga. Pyntylli lang ïa baroh ki jingpang bad ki jingjynjar jong nga bad ki jingshahshitom jong Me khnang ba ngan long uba bit na ka bynta ka Jingpynim jong Me. Amen.
--------------------------------------------------------------------------------------------------
Ka jingduwai na ka bynta ka jingkylla kabamut ki nongpop
Ko Blei, ko Kpa Badonbor tam, ngi pyndonburom bad ïaroh ïa Me. Ngi sngewnguh ïa Me namar ba Me la thaw ïa u briew ha ka dur jong Me, bad namar ka jingieid jong Me, Me la phah ïa la u jong u Khun baieid eh ban pynim ïa u briew uba la phai noh na Me. Ko Trai, ngi duwai ha Me, Uba la khot ïa ngi sha ka jingkylla kabamut bad sha ka jingim bymjukut lyngba u Khun baieid eh jong Me bad u Trai jong ngi, u Jisu Khrist, to isynei ïa i... (ong ïa ka kyrteng jong u/ka briew) uba la shahteh shahkhum ha ka... (ong ïa ka jinglong basniew/ ka jingmlien basniew/ ka kam basniew/ ka jingleh palat jong u/ka briew).
Ko Trai, Me uba la khot ïa ngi ban shun thlong mluh thlong sying ïa ka pop bad ki daw jong ka da kaba pynbna ba, ‘Phin sa jot noh lada phim kylla kabamut’, ktah ïa ine i hynmen para jong ngi, i... (kyrteng) da ka bor jong Me ban pynlah ïa i ban isih noh ïa ka pop bad ïa ki daw jong ka. Namar ka jingshahshitom bad ka jingshah sahnarphna jong u Khun Bakhuid jong Me, pyllait ïa i... na baroh ki jingshahteh shahkhum jong ka pop bad pynlah ïa ka dohnud jong i ban plie bad pdiang ïa u Khun Baieid eh jong Me, u Jisu Khrist, bad ïa u Mynsiem jong Me. Ko Trai Jisu, to synreit ïa i... da ka Snam Bakordor jong Me kaba Me la phlei halor ka Diengphna na ka bynta ka jingmap ïa ki pop. Bad da ka bor jong ka Diengphna Bakhuid jong Me, pyllait ïa i... na ki bor ka jingsniew baroh bad na ka bainong jong ka pop.
Ko Badonbor tam, Me uba la kyrkhu ïa kito baroh kiba la ngeit ha u Jisu, u Khun Baieid eh jong Me, da ka jingaiei jong ka jinglong khun Blei, to kyrkhu ïa i... ban ngeit ha u Jisu, bad ban ïohpdiang ïa u Mynsiem Bakhuid jong Me khnang ba in dup khot ïa Me ‘Ko Pa’. Bad kumta, to ai ba ngin ïalum lang ban khot ïa ka Kyrteng Bakhuid jong Me, ban duwai bad pyndonburom ïa Me.
Junom la junom, u Trai Badonbor tam, u Kpa, u Khun bad u Mynsiem Bakhuid. Amen.
--------------------------------------------------------------------------------------------------
Ka jingduwai ban ïoh kurim
Ko Blei, u Kpa, u Khun bad u Mynsiem Bakhuid, nga ïaroh ïa Me namar ba Me la thaw ïa ki briew shynrang bad kynthei. Nga pynpaw ka jingkmen ïa Me na ka bynta ka jingïada baïaineh haba Me ïalam bad tehsong ïa ka shongkha shongman bad kyntiew ïa ki arngut sha ka kyrdan jong ka jinglongkmie longkpa. Nga sngewnguh ïa Me ba Me la kyrkhu ïa nga da ka jingsngewtynnad bad ka jingkhot sha ka jingim shitnga. Nga thrang ïa ka jingim shikurim kaba katkum ka Mon Bakhuid jong Me.
Ko Trai, Me tip kham bha ïa ka jingthrang ka dohnud, ka jingkyrmen bad ka hok ka sot jong nga ban ïa nga, to jied hi ma Me ïa u/ka kurim na ka bynta jong nga. Ko Trai, ma Me uba la jied da ka kam phylla jong Me ïa u Tobias bad ka Sarah bad kyntiew ïa ki sha ka jingim shikurim kaba dap kyrhai da ka jingkyrkhu jong Me, to pyni ha nga ïa u/ka briew ïa uba/kaba Me la jied na ka bynta jong nga. To kyrkhu, ko Trai, ïa ka jingkyntiew-kurim jong ngi ba kan bit kan biang bad ïaid-beit ïaid-ryntih khlem kano kano ka jingpynthud. Amen.
----------------------------------------------------------------------------------------------------
Ka jingduwai jong ki arngut shikurim
Ko Blei, ko Kpa Badonbor tam, ngi pyndonburom ïa Me, ngi ïaroh ïa Me bad ngi sngewnguh ïa Me na ka bynta ka jingim shikurim jong ngi kaba la sdang da ka jingkyrkhu kyrdoh jong Me. Ïarap ïa ngi ba ngin long kiba ïaineh ha ka jingkhuid jingkyntang, ban im da ka jingieid bad jingïasngewthuh jingmut markylliang. Pynkhlaiñ ïa ngi, Trai, ba ngin ïashimbynta lang ïa ki jingthrang jingangnud, ki jingkyrmen bad ki jingsngewdiaw, ki jingjop bad jingshahrem, ki jingkmen bad jingsngewsih. Wat shah ïa ngi, Trai, ban ïakynnoh iwei ïa iwei pat. Ïada ïa ngi na ki jingbymïasngewthuh jingmut bad ki jingïabitar. To ai ba yn ym don kano kano ka bor ne mano mano hangne ha pyrthei ban lah ban pynïakhlad ïa ngi. Ïarap ïa ngi, Trai, ba ngin jan sha Me da kawei ka jingmut bad ban ïoh jakarieh da kaba phai sha Me ha ki jingsngewsih bad ki jingeh jingjynjar baroh. Pyndap ïa ngi da ka bor ba ngin lah ban ai kham bun ban ïa kaba ngi ïohpdiang, ban ieid kham palat ban ïa kaba ngi ïoh jingieid, ban sngewthuh kham bha ban ïa kaba kiwei ki sngewthuh ïa ngi. Ïarap ïa ngi Trai, ban im ka jingim kaban pynsngewbha ïa Me man la ka por da kaba shimti ïa ki jingkitkhlieh baroh ba Me la pynkhamti ha ngi.
Ngi sngewnguh ïa Me, Trai, na ka bynta ki khun ki kti, i... (jer kyrteng ïa ki khun) kiba Me la ai kum ki jingaisngewbha jong Me. Ïarap ïa ki ba kin nang san ha ka jingieid jong Me, bad ha ka jingngeit baskhem da ka jingsumar sukher jong Me, bad ba kin dup heh dup san ha ka rukom kaban pynsngewbha ïa Me. Ïada ïa ki, Trai, na ki bor jong ka pop bad ki jingpynshoi. Bad namarkata, kyrkhu ïa ngi khnang ba ngin poi baroh sha ka ïingshongneh bad Me ha bneng.
Junom la junom, u Trai Badonbor tam, u Kpa, u Khun bad u Mynsiem Bakhuid. Amen.
----------------------------------------------------------------------------------------------------
Ka jingduwai Sngikha
Ko Jisu Bathiang tam, nga ïaroh ïa Me ba me la ai ïanga sa uwei pat u snem ha ka jingim jong nga. Nga ïaikynmaw bad sngewnguh barabor ïa Me na ka bynta ki jingkyrkhu ba Me la theh kyrhai ha nga ha une u snem ba la dep.
Ko Trai, pynkylla ïa ki por jong ka jingjop jong nga sha ki jingkynmaw ieid; ïa ki jingshahrem jong nga ban sngewthuh ïa ka jingtlot jong nga bad ai ba kin long ki lad ban kham shaniah ha Me. To ai ba ki jingsngewsih jong nga kin ïarap ban wanlam ïa nga khamjan sha ka sem langbrot jong Me.
Nga sngewsih na ka bynta ki kynta kiba nga la pynsyrwa kai, bad na ka bynta ki khyllipmat ba nga la pynsngewsih ïa Me.
Nga khlem lah ban pynïaid ïa ka jingim jong nga katkum ka Mon Bakhuid jong Me. Pynban, Trai, ha une u snem thymmai, ïarap ïa nga ban sdang thymmai noh ïa la ka jingim hadien ba nga la pynbeit ïa ki jingbymbiang baroh, khnang ban wanrah burom ïa ki kmie ki kpa, ki bahaïing hasem bad ïalade hi.
Ko Trai, to theh kyrhai ki jingkyrkhu halor ki kmie ki kpa jong nga kiba la ai ïa nga ïa kane ka jingim bad pynheh pynsan ïa nga, bad ïa ki bahaïing hasem kiba la ieid la thoin bad ïarap ha ka jingim jong nga, bad ïa baroh kito kiba kynmaw ïa kane ka sngi bad kiba la khublei bad duwai na ka bynta jong nga. Amen.
---------------------------------------------------------------------------------------------------
Ka jingduwai ban ïoh khun
Ha ka kyrteng u Kpa, u Khun bad u Mynsiem Bakhuid. Amen.
Ko Blei, ko Kpa baieid jong ngi, ngi sngewnguh ïa Me ba me la ïalam lynti ïa ngi sha ka shongkha shongman. Ngi duwai ha Me, ko Kpa, uba tip kham bha ïa ki jingthmu bad jingangnud jong ngi, lada ka long ka Mon Bakhuid jong Me, kyrkhu bad ai ha ngi ïa i khun. Ko Trai jong ka jinglongmie jinglongkpa, to map ïa ki pop bad ki jingbakla jong ngi, bad kyrkhu ïa ngi.
Ko Blei, ko Kpa jong ngi, Uba la kyntiew ïa ka Maria Theisotti Batlem sha ka jinglong Kmie baphylla; Uba la pynlongkmie longkpa ïa u Abraham bad ka Sara wat ha ka jinglong tymmen jong ki; lada Me mon, ai ha ngi ruh ïa ka jingkyrkhu jong Me ban longkmie longkpa. Pynseisoh ïa ka jingim jong ngi khlem da shah kynthoh da ka jingdon bad jingieid jong i khun.
Namarkata, ko Trai, shah ïa ngi ban long kiba donbok ban ïohmad ïa ka jingieid jong Me ha kane ka pyrthei. Amen.
--------------------------------------------------------------------------------------------------
Ka jingduwai na ka bynta kiba pang
Ko Trai, Jisu, Me uba la pynpaw ïa ka jingieid bad jingsngewlem sha kiba pang bashitom bad kiba shem jynjar da kaba ong ba ‘kiba koit bakhiah kim donkam ïa u nongpynkhiah, hynrei tang kiba pang keiñ’, ngi ïaroh bad pyndonburom ïa Me. Pyntngen bad pynkoit ïa baroh kiba pang bashitom kiba shem jynjar met bad mynsiem.
Ko Trai Jisu, Me uba la pynpeit ïa kiba matlah, uba la pynïohsngew biang ïa kiba kyllut bad uba la pynkoit ïa kiba pang bashitom, lehsbun ïa ngi kiba khot kyrpad bad buh jingshaniah ha ka Kyrteng Bakhuid jong Me. Da kaba pyrkhat sngewlem ïa ki kam babha jong baroh ki briew babha ha kane ka pyrthei, bad jong baroh ki riewkhuid bad ki nongïasaid, bad jong u Joseph, bad jong ka Kmie jong Me, ka Maria Theisoitti Balakyrkhu, to isynei ïa ngi kiba shem jynjar na ka daw jong ki jingpang jingshitom. To ai ha ngi ki jingkyrkhu ba ngin lah ban pdiang suk mynsiem ïa baroh ki jingpang jingtyrha bad ki jingkhuslai jingmut da ka jingkmen, jingïaishah bad jingaiti lut ha ka Mon Bakhuid jong Me na ka bynta ka jingmyntoi ka mynsiem bad ka met jong ngi. To kyrkhu kyrhai ïa kito baroh kiba sumar sukher bad kiba peit bakhmih ïa ngi. To kner ïa ka Kti Kamon bapynkoit jong Me, ko Jisu, ko jakarieh jong kiba pang bashitom, kyrkhu bad pyntngen ïa ngi da ka jingkoit jingkhiah bapura.
Junom la junom, ko Trai Badonbor baroh, u Kpa, u Khun bad u Mynsiem Bakhuid. Amen.
---------------------------------------------------------------------------------------------------
No comments:
Post a Comment