KI JINGDUWAI HA KA MARIA
Ka jingpynkyntang ha ka Maria ka Kmie ka Jingsngewsih
Ko Theisotti Bakhuid tam bad ko Syiem ki Martyr, ko Maria, jin lada nga la don ha Bneng, hangta ngan puson ïa ka burom ba la ai sha Phi da ka Triniti Bakhuid Tam bad da ka Dorbar Bneng baroh kawei! Hynrei naba nga dang long tang u pilkrim ha kane ka them bajawummat, to pdiang ïa nga, u shakri bym biang bad bym bitdor jong phi bad u nongpop bapli, ïa ka nguh syiem bad ka jingpyndem bapura jong ka jinglong shakri kaba manga kum u briew nga lah ban tyrwa. Ha ka Dohnud Batlem jong phi, kaba la dung da shibun tylli ki sum jong ka jingsngewsih, nga aiti mynta ka sngi ïa la ka mynsiem batlot junom la junom; pdiang ïa nga kum u nongïohbynta lem ha ka jingsngewsih kthang jong phi. Ryngkat bad phi, ko Maria, ngan shah ïa baroh ki jingshitom, ki jingkren pyrshah, ki jingpang, kiba pynsngewbha ïa u Khun Blei jong phi ba Un wan ha ka jingim jong nga. Nga tyrwa ha phi ïa kine baroh, ban kynmaw ïa ki jingsngewsih kthang kiba phi la shah ha ka jingim jong phi, ba baroh ki jingmut jingpyrkhat jong nga, baroh ki jingtied jong u klongsnam jong nga kin long nangne shakhmat kum ki jingsngewlem na ka bynta ki jingsngewsih jong phi, bad ki jingsngewbha na ka bynta ka burom ba phi la ïoh mynta ha Bneng.
Ko Kmie baieid, mynta nga dang sngewlem ïa ki jingsngewsih kthang jong phi, bad risa kmen haba ïohi ba la pyndonburom ïa phi, phi ruh to sngewlem na ka bynta jong nga, bad pynïasuk ïa nga bad la u Khun jong phi, u Jisu, khnang ba ngan kylla long u khun bashisha bad bashaniah jong phi; to wan ha tmier ka jingïap jong nga bad synran lem ha ka jingpisa bakhatduh jong nga, kumba phi la don lang ha ka Jingpisa jong u Khun Blei jong phi, u Jisu, khnang ba na kane ka jingpynryngkar bashemjynjar ngan leit beit sha Bneng, hangta ban ïoh bynta lem ha ka burom jong phi. Amen.
--------------------------------------------------------------------------------------------------
U ROSARY JONG KI UMMAT-SNAM KA MARIA THEISOTTI BALAKYRKHU
(U soitan u shah-rem bad u phet krad na kito kiba sam ne duwai ïa u Rosary)
Ko Jisu ba la shah sahnarphna, ngi tyrwa ha Me ïa ki ummat-snam jong ka Kmie Bakhuid jong Me kaba dem ha ki kjat Bakhuid jong Me bad kaba bud ïa Me da ka jingieid badap isynei ha ka lynti ïaid bakordit sat jong Me sha Kalbari. Ko Trai Babha, ai ha ngi ki jingkyrkhu ban sngewthuh kham bha ïa ka khubor jong ki jingjaw ummat jong ka Kmie Bakhuid, kaba ïakhleh bad ka Snam Bakhuid, bad kumta ka la pyndep katkum ka Mon Bakhuid jong Me ban pynlah ïa ngi ban ïaroh bad mane ïa Me man la ka por ha bneng ryngkat bad ka Maria Bakhuid.
(Ha ki symboh kpieng baheh jong u Rosary)
Ko Jisu, to peit isynei halor ki Ummat-snam Bakhuid jong ka Kmie Bakhuid jong Me, kaba la ieid ïa Me haduh katta katta ha kane ka pyrthei, bad kaba ïai ieid bad synshar lang bad Me ha Bneng. (shisien)
(Ha ki symboh kpieng barit jong u Rosary)
Ko Jisu Baieid eh! Namar ki Ummat-snam Bakhuid ba la pynjaw da ka Kmie jong Me, to sngap ïa ki jingduwai jong ngi. (7 sien)
Ko Jisu, to peit isynei halor ki Ummat-snam Bakhuid... (shisien)
Ko Jisu Baieid eh! Namar ki Ummat-snam Bakhuid... (7 sien)
(Ong biang ïa kitei ki jingduwai 7 sien)
---------------------------------------------------------------------------------------------
Ka jingduwai sha ka Kmie Basotti bakhlem pop tynrai
Ko Theisotti Bakhuid tam bakhlem pop tynrai, bad ko Kmie Bneng baieid jong nga! Kum uwei uba kham tlot ban ïa uno uno, nga phet sha phi, ko Kmie jong u Trai jong nga, bad ko Syiem jong ka pyrthei baroh, ko jingshaniah bad ko jakarieh jong nga. Nga dem bad ai burom ïa phi, ko Syiem ki bneng. Nga ïaroh ïa phi naba phi la ïarap ban ïasaid lem na ka bynta jong nga kat haduh kane ka khyllipmat. Khamtam eh, nga ïaroh ïa phi ba phi la pyllait ïa nga na ka dujok, kaba bunsien nga dawa hok. O! Ko Kmie baieid eh jong u Blei, nga ieid ïa phi bad ngan ïaiburom ïaphi barabor; bad nga kular ruh ban wan ïalam bun ki mynsiem sha ka jingieid jong phi. Nga aiti ha phi ïa ka jingshngaiñ bad jingkyrmen jong nga, ko Kmie baieid. Nga duwai, ko Kmie ki jingaiei, ïada ïa nga uba shaniah ha phi, da ki jaiñkup basyaid jong phi. Pyllait ïa nga, ko Maria, na baroh ki jingtynjuh. Nga duwai, ko Kmie baieid, khnang ba ngan don ka jingieid bashitrhem ïa u Jisu. Nga kyrmen ba da ka jingïarap jong phi, ngan ïoh ïa ka jingïap suk. Ko Kmie Bakhuid tam, nga kyrpad ïa phi ban ïarap ïa nga man la ka por, bad khamtam eh ha tmier ka jingïap. Haduh ba phin da shem ïa nga ha bneng kum ka mynsiem ba la shah pynim, sngewbha wat iehnoh ïa nga, bad ngan ïai ïaroh ïa phi junom la junom, bad ngan ïai kynud ïa ki jingïarap lem jong phi. Kumta, nga shaniah ha phi, ko Kmie Bakhuid. Amen.
No comments:
Post a Comment